𝗧𝗜𝗡𝗔𝗧𝗔𝗬𝗔𝗡𝗚 𝗛𝗜𝗚𝗜𝗧 ₱𝟮𝟴𝟱𝗠 𝗣𝗜𝗡𝗦𝗔𝗟𝗔 𝗦𝗔 𝗔𝗚𝗥𝗜𝗞𝗨𝗟𝗧𝗨𝗥𝗔, 𝗡𝗔𝗜𝗧𝗔𝗟𝗔 𝗦𝗔 𝗢𝗥𝗜𝗘𝗡𝗧𝗔𝗟 𝗠𝗜𝗡𝗗𝗢𝗥𝗢 𝗠𝗔𝗧𝗔𝗣𝗢𝗦 𝗔𝗡𝗚 𝗦𝗨𝗡𝗨𝗗-𝗦𝗨𝗡𝗢𝗗 𝗡𝗔 𝗞𝗔𝗟𝗔𝗠𝗜𝗗𝗔𝗗

25 July 2025 | News by PISD

Umabot na sa ₱285,142,601.89 ang tinatayang halaga ng pinsala sa sektor ng agrikultura ng Oriental Mindoro dulot ng magkakasunod na bagyong #CrisingPH, #DantePH, #EmongPH at habagat.

Ito ay ayon sa datos mula sa Provincial Agriculturist’s Office (PAgO) ngayong Hulyo 25.

Pinakamalaking bahagi ng tinamong pinsala ng lalawigan ay mula sa mga produktong agrikultural. Umabot na sa ₱218.5M ang nasirang ani at pananim na direktang nakaapekto sa 5,999 magsasaka.

Samantala, hindi rin nakaligtas ang mga magsasakang ang ikinabubuhay ay ang paghahayupan. Tinatayang nasa ₱886,200.00 na ang kabuuang halaga ng mga nawala at namatay na alagang hayop ng 51 magsasaka.

Malaki rin ang naging epekto sa sektor ng aquaculture, kung saan ₱61.6 milyon ang tinatayang lugi ng 217 na mangingisda.

Bukod dito, umabot na sa 59 na yunit ng mga makinarya at iba pang gamit pang-agrikultura ng 33 magsasaka ang nasira. Ito ay may kabuuang halagang ₱318,500.00. Nawalan din ng mga gamit ang 550 na mangingisda na nagkakahalagang ₱1.2M.

Patuloy naman ang isinasagawang monitoring at balidasyon ng PAgO, katuwang ang Department of Agriculture – Agricultural Program Coordinating Office (DA-APCO) upang maitiyak na mabibigyan ng kaukulang tulong ang mga apektadong magsasaka at mangingisda ng lalawigan.