May 1, 2026 | News by PISD
𝗗𝗮𝗮𝗻-𝗱𝗮𝗮𝗻𝗴 𝗧𝗿𝗮𝗯𝗮𝗵𝗼, 𝗔𝗹𝗼𝗸 𝘀𝗮 𝗶𝗸𝗮-𝟭𝟮𝟰 𝗟𝗮𝗯𝗼𝗿 𝗗𝗮𝘆 𝗝𝗼𝗯 𝗙𝗮𝗶𝗿 𝘀𝗮 𝗞𝗮𝗽𝗶𝘁𝗼𝗹𝘆𝗼
01 Mayo 2026, Lungsod ng Calapan – Isinasagawa ang 124th Labor Day Job Fair ng Department of Labor and Employment (DOLE) Oriental Mindoro, sa pangunguna ni Atty. Roderick F. Tamacay at Technical Support and Services Division (TSSD) Chief DOLE MIMAROPA Regional Office Loreta Dueñas-Catapang ngayong araw sa Kapitolyo.
Katuwang dito ang Provincial Public and Employment Office (PPESO) sa pangunguna ni PPES Officer Antonio M. Magnaye, Jr.
Dinaluhan ang job fair ng iba’t ibang kumpanya at institusyon na nag-alok ng bakanteng posisyon mula sa iba’t ibang sektor gaya ng manufacturing, retail, logistics, healthcare, marketing, food service, at iba pa.
Tinatayang umabot sa mahigit 500 aplikante ang dumalo ngayong umaga at patuloy pa ang pagdagsa ng mga job seeker sapagkat isasagawa pa ang programa hanggang hapon.
Kabilang sa mga lumahok ay ang Asia Brewery Incorporated, Tamaraw Vision Network, FCN Ormin Distribution, Counterpart Resource Multi-purpose Cooperative (CREMPCO), One Source General Solutions, PKI Manufacturing and Technology, Zero Illiteracy and Inumeracy program at iba pa.
Ilan sa mga trabahong maaaring applyan ay production operators, service crew, delivery riders, office staff, technicians, engineers, sales associates, at iba pang entry-level at professional positions. Bukas ang job fair sa lahat ng job seekers maging fresh graduates o may karanasan na nagnanais makahanap ng trabaho.
Bukod sa mga oportunidad sa trabaho, nagkaroon din ng one-stop shop services ang TESDA, SSS, Pag-IBIG, PhilHealth, PSA, NBI, CSC, at DICT, gayundin ang serbisyong pangkalusugan sa pamamagitan ng YAKAP Clinic ng Oriental Mindoro Provincial Hospital, upang mas mapadali ang pagproseso ng mga kinakailangang dokumento ng mga aplikante.