September 23, 2025 | News by PISD
Sa isinagawang Provincial Development Full Council meeting ngayong araw, matagumpay na inaprubahan ang Annual Investment Program (AIP) para sa taong 2026 at ang Provincial Development Investment Program (PDIP) para sa 2026–2028 ng Pamahalaang Panlalawigan ng Oriental Mindoro.
Pinangunahan ni PDC Chair Gobernador Humerlito “Bonz” Dolor ang pagpupulong matapos matiyak ang quorum, habang si OIC-PPDO Enp Jose Maria S. Dalupan ang nanguna sa pagkilala sa mga kasapi ng Provincial Development Council (PDC).
Ang AIP 2026 ay may kabuuang pondong ₱10,926,814,319.00 na ilalaan sa apat na pangunahing sektor: General Public Service (₱1.41 bilyon), Social Services (₱5.08 bilyon), Economic Development (₱4.14 bilyon), at Other Services (₱291.47 milyon). Samantala, ang PDIP 2026–2028 ay may kabuuang halagang ₱26,867,788,622.00 na hahatiin din sa mga nabanggit na sektor.
Bukod sa pag-apruba ng mga investment programs, anim pang resolusyon ang ipinasa ng PDC. Kabilang dito ang pagsuporta sa House Bill No. 4584 ni Rep. Brian Poe Llamanzares at Senate Bill No. 1289 ni Sen. Christopher Lawrence “Bong” Go para sa pagtatayo ng MIMAROPA Regional Hospital sa Oriental Mindoro, na iniendorso sa DOH, RDC, House of Representatives, at Senado. Inaprubahan din ang panukalang konstruksyon ng Puerto Galera Cruise Port at Tourism Package for Cruise Passengers, gayundin ang Naujan Lake Tourism Development Project na iniendorso sa mga ahensyang tulad ng RDC, DOT, TIEZA, DOTr, DA, DPWH, at DENR.
Bilang bahagi ng suporta sa mga civil society organizations, personal na pinangunahan ni Gobernador Dolor ang pagkakaloob ng tulong pinansyal na tig-₱100,000 sa Bansud Livestock Multi-purpose Cooperative, Manaul Women’s Program ng Mansalay, at Samahan ng Mangingisda at Magsasaka ng Pocanil ng Bulalacao.
Dinaluhan ang pagpupulong nina ABC President Board Member Ralph Jonnel Recto, Board Member Ryan Z. Arago, Board Member Roland H. Ruga, Board Member Jomarc Philip E. Dimapilis, SP Secretary Diwata Fetizanan, Naujan Mayor Joel Teves, San Teodoro Mayor Karen Miranda, Bongabong Mayor Michael Malaluan, Roxas Mayor Jerwin Dimapilis, Gloria Mayor Teresita Ong, Socorro Mayor Nemmen Perez at Pinamalayan Mayor Rodel Magsino, mga kinatawan ng civil society organizations, Provincial Administrator Earl Ligorio Turano at mga hepe at program implementers ng Pamahalaang Panlalawigan.
Ang mga hakbang na ito ay patunay ng patuloy na pagsusumikap ng pamahalaang panlalawigan tungo sa mas inklusibo, progresibo, at makataong kaunlaran para sa buong Oriental Mindoro.