September 11, 2025 | News by Special Concern Division
Matagumpay na idinaos ang Linggo ng Kabataan 2025 Sports Fest noong Setyembre 5–7, 2025 na nagsilbing plataporma para sa pagpapalakas ng samahan, talento, at kakayahan ng mga kabataang Mindoreño sa larangan ng isports.
Kabilang sa mga tampok na palaro ang Intertown Volleyball Men at Women, Basketball 3×3, Badminton Men at Women, Chess, Scrabble, at Games of the Generals na nilahukan ng iba’t ibang delegado mula sa mga bayan at lungsod ng lalawigan.
Ipinakita ng mga manlalaro ang kahusayan at dedikasyon sa bawat laban, habang pinapatibay din ang mga halagang gaya ng disiplina, pagkakaibigan, at respeto sa kapwa manlalaro. Higit pa rito, nagsilbing pagkakataon ang naturang paligsahan upang mahubog ang mga kabataan hindi lamang sa pisikal na aspeto, kundi pati na rin sa mental na talino at estratehiya, partikular sa mga larong Chess, Scrabble, at Games of the Generals.
Sa pagtatapos ng tatlong araw na kompetisyon, naging malinaw ang tagumpay ng Sports Fest bilang bahagi ng selebrasyon ng Linggo ng Kabataan 2025—isang patunay na buhay na buhay ang diwa ng kabataan sa Oriental Mindoro, handang makiisa at makipagtagisan para sa isports at komunidad.